راجل عنده 91 سنة وقف قدام لجنة تحكيم برنامج"دولة التلاوة" المصري
من "على الناصية" لـ "دولة التلاوة"... حكاية 60 سنة انتظار
فيه أحلام بتكبر معانا وفيه أحلام بتستنى عمر كامل عشان تتحقق.. بس حكاية الشيخ عوض الفردي فيها حاجة أبعد من مجرد حلم اتحقق.
راجل عنده 91 سنة وقف قدام لجنة تحكيم برنامج"دولة التلاوة" المصري، وقرأ القرآن بصوت أبهر الناس. لكن اللحظة دي كان وراها حكاية عمر بحاله.
الشيخ عوض اتولد يتيم في بيت بسيط في أبو حمص بالبحيرة وفي ظروف مادية صعبة. ما كانش حواليه حد يقدر يتفرغ لتعليمه أو ياخد بإيده في طريق حفظ القرآن وعلوم الدين فاشتغل في الزراعية بقريته
وفى أوائل الستينيات كان جواه حلم صغير، يمكن وقتها ما كانش يتخيل إنه هيفضل معاه كل العمر ده.
كان بيسمع برنامج"على الناصية" لآمال فهمي اللي كانت بتقابل الناس في الشارع وتكتشف مواهبهم، وكان نفسه في يوم يقف قدام ميكروفون ويقرأ القرآن بصوته ويسمعه الناس.
الحلم وقتها ما اتحققش لكنه فضل عايش جواه
عدّت السنين والشيخ عوض كبر وعلاقته بالقرآن فضلت تكبر معاه. بدأ يتعلم أحكام التجويد بنفسه ويحفظ ويحفّظ غيره، ووصل لمرحلة إنه يختم المصحف كل يومين.
تخيلوا إن كل السنين دي كان فيه راجل بيقرأ القرآن وبيعلمه وبيجتهد في صمت من غير ما يكون مستني حد يكتشفه.
لحد ما واحد من تلاميذه وهو الشيخ أحمد عامر، اقترح عليه يقدم في"دولة التلاوة" وفعلا الراجل اللي كان بيحلم من ستين سنة إنه يوصل صوته للناس، لقى نفسه أخيرًا واقف قدامهم وهو عنده 91 سنة.
ظهور الشيخ عوض ما كانش مجرد مشاركة في برنامج لكنه كان تكريم لرحلة طويلة واعتراف بإن فيه مواهب وحكايات ممكن تفضل مستخبية عشرات السنين، مش لأنها أقل قيمة لكن لأن أصحابها ما جاتلهمش الفرصة.
تخيلوا إن الراجل اللى كان بيسمع"على الناصية" من أكتر من ستين سنة، بقى النهارده هو نفسه صاحب الحكاية اللي الناس بتسمعها وتشوفها فى كل شارع وكل ناصية





