السعر على الخاص.. مخالفة قانونية ولازم نعرف حقنا
بتدخل صفحة تبيع هدوم أو أجهزة أو مستحضرات تجميل، تلاقي المنتج عاجبك لكن السعر مش مكتوب.. تسأل في الكومنتات، ييجي الرد المعتاد: «ابعتلنا خاص»
لكن السؤال: ليه لسه بنشتري من صفحات بتخبي الأسعار؟ وهل السعر ممكن يختلف من شخص للتاني حسب شكله أو قدرته على الدفع؟
إخفاء السعر مش مجرد أسلوب تسويقي مستفز، لكنه مخالفة لقانون حماية المستهلك، اللي بيلزم التاجر بالإعلان عن سعر السلعة بشكل واضح قبل إتمام البيع.
والأخطر إن بعض الصفحات ممكن تعرض نفس المنتج بأسعار مختلفة من شخص للتاني، وده بيفتح الباب للتلاعب واستغلال المستهلك.
يعني ممكن تدفع أكتر من غيرك في نفس السلعة، لمجرد إن البائع شايف إنك تقدر تتحمل السعر الأعلى
طيب نحمي نفسنا إزاي؟
أولًا، ما تشتريش قبل ما تعرف السعر النهائي شامل الشحن وأي مصاريف إضافية، وقارن الأسعار بين أكتر من بائع، واحتفظ بصور المحادثات وإثباتات الدفع لو حصل تلاعب.
ولو الصفحة بترفض تعلن السعر أو بتقدم سعرًا مضللًا، تقدر تقدم شكوى لجهاز حماية المستهلك على الخط الساخن 19588.
السؤال بقى: هل هنبطل نتعامل مع الصفحات اللي بتكتب «السعر على الخاص»؟ ولا هنفضل نقبل الطريقة دي في البيع؟





